မြန်မာစာအဖွဲ့ဝင် ဆရာကြီးများနှင့် ဘာသာစကားပညာရှင်ကြီးများ၏ တန်ဖိုးမဖြတ်နိုင်သော အတွေ့အကြုံ၊ ပညာဗဟုသုတ အမွေ များကို လက်ဆင့်ကမ်းမျှဝေပေးရာတွင် ယူတတ်ရင်ရတယ်ဆိုတဲ့စကားနှင့်အညီ “ရအောင်ယူဖို့”နှင့် ရရှိသောပညာဗဟုသုတ အမွေများကို မိမိတပည့် အနာဂတ်မျိုး ဆက်သစ် ကျောင်းသားလူငယ်များကို သင်ကြားရာတွင် ပြန်လည် အသုံးချသွားကြရန် တက္ကသိုလ် စိန်ရတု ခန်းမတွင် ယနေ့ကျင်းပသော “မြန်မာစာအဖွဲ့ဝင် ဆရာကြီးများနှင့် ဘာသာစကားပညာရှင်ကြီးများ၏ ပညာဗဟုသုတအမွေ လက်ဆင့်ကမ်း မျှဝေခြင်းနှင့် မြန်မာစာမြှင့်တင်ရေးညှိနှိုင်း ဆွေးနွေးပွဲ”တွင် ပြည်ထောင်စုဝန်ကြီး ဒေါက်တာမျိုးသိမ်းကြီးက မြန်မာစာ ဆရာ၊ ဆရာမများကို မှာကြားသည်။
ပြည်ထောင်စုဝန်ကြီးက ဆက်လက်ပြောကြားရာတွင် မြန်မာစာပေနှင့် မြန်မာဘာသာစကား ခက်ခဲနက်နဲမှုများကို ရှင်းလင်းဖြေရှင်း ပေးမည့် မြန်မာစာပညာရှင်ဆရာကြီးများ၏ အဆိုအမိန့်များကို လိုက်နာမှတ်သားပြီး ပညာအမွေ ရယူခြင်းဖြင့် စာပေနှင့်လူမျိုး၏ အကျိုးစီပွားကို ဖော်ဆောင်ရန်၊ စာပေမြင့်မှ လူမျိုးတင့်မည်၊ စာပေပျောက်လျှင် လူမျိုးပျောက်မည် -နိုင်ငံချစ်စိတ်ဖြင့် နိုင်ငံတော်ကြီး အဓွန့်ရှည်စွာတည်တံ့ခိုင်မြဲရေး၊ တိုင်းရင်းသားလူမျိုးရယ်လို့ ကမ္ဘာတည်သရွေ့ တည်ရှိနိုင်ရေးအတွက် မြန်မာစာပေနှင့် တိုင်းရင်းသား စာပေကို မြတ်နိုးစွာ ထိန်းသိမ်းမြှင့်တင်ကြရန် တိုက်တွန်းပြောကြားသည်။
Language Teaching and Language Testing ပညာရပ်သည်လည်း မြန်မာစာ၊ အင်္ဂလိပ်စာ အစရှိသော ဘာသာစကားသင် ဆရာ ဆရာမများ၏ သင်ကြားရေးနှင့် စစ်ဆေးအကဲဖြတ်ရေး အရည်အသွေးများကို မြှင့်တင် ပေးနိုင်မည် ဖြစ်သောကြောင့် အလေးအနက်ထား လေ့လာမှတ်သားပြီး လက်တွေ့သင်ကြားရေးနယ်ပယ်တွင် အသုံးချ သွားကြရန်မှာကြားသည်။
စာနယ်ဇင်းနှင့်ရုပ်သံမီဒီယာများမှ တက်ရောက်လာကြသော တာဝန်ရှိသူများအနေဖြင့်လည်း မိမိတို့တတ်ကျွမ်းသော မြန်မာစာ အရည်အသွေး ကို မြှင့်တင်လျက် မြန်မာစာပေဖွံ့ဖြိုးတိုးတက်ရေးအတွက် ကူညီစောင့်ရှောက် ပေးကြရန် မှာကြားတိုက်တွန်းခဲ့သည်။
မြန်မာစာအဖွဲ့အနေဖြင့်လည်း မြန်မာ-အင်္ဂလိပ်-မြန်မာအဘိဓာန်ကို ဝေါဟာရ စုံလင်စွာဖြင့် ထုတ်ဝေရန် ပြုစုလျက်ရှိကြောင်းနှင့် ခေတ်ပေါ် ဝေါဟာရအဘိဓာန် ပြုစုလျက်ရှိကြောင်း သိရှိရသဖြင့် ဂုဏ်ယူဝမ်းမြောက်ပါကြောင်းနှင့် မြန်မာဝေါဟာရ Lexical Database ကို လည်းပြီးမြောက်အောင်မြင်အောင် ဆက်လက်တည်ဆောက်သွားရန် တိုက်တွန်းခဲ့သည်။
ဆက်လက်၍ ပညာရေးဝန်ကြီးဌာန မြန်မာနိုင်ငံတိုင်းရင်းသား ဘာသာစကားဦးစီးဌာန ညွှန်ကြားရေးမှူးချုပ် ဒေါက်တာဇော်မြင့်က အခမ်းအနားတက်ရောက်သူစာရင်းနှင့် အခမ်းအနားအစီအစဉ်များကို အသေးစိတ်ရှင်းလင်းတင်ပြသည်။ ထို့နောက် မှတ်တမ်းတင် စုပေါင်းဓါတ်ပုံ ရိုက်ကူးခဲ့ကြသည်။
အဆိုပါအခမ်းအနားသို့ ပညာရေးဝန်ကြီးဌာနရှိ ဝိဇ္ဇာသိပ္ပံတက္ကသိုလ်၊ နည်းပညာတက္ကသိုလ်၊ ကွန်ပျူတာတက္ကသိုလ် နှင့် ပညာရေး ကောလိပ်များမှ မြန်မာစာ ပါမောက္ခ၊ ဌာနမှူး၊ ဆရာ/ဆရာမ စုစုပေါင်း (၁၈၃)ဦး၊ သတင်းစာနှင့်စာနယ်ဇင်းမီဒီယာများ၊ ရုပ်မြင် သံကြား နှင့် FMရေဒီယိုများမှ အယ်ဒီတာချုပ်များ၊ အယ်ဒီတာများ စုစုပေါင်း (၇၅)ဦး၊ မြန်မာနိုင်ငံ တိုင်းရင်းသားဘာသာစကား ဦးစီးဌာနမှ မြန်မာစာ စာတည်းမှူးချုပ်ဦးစီးသော စာပေဝန်ထမ်းများ၊ မြန်မာစာအဖွဲ့ အဖွဲ့ဝင် ဆရာကြီး၊ ဆရာမကြီးများ၊ ဘာသာစကားပညာရှင် ဆရာကြီးများနှင့် ဖိတ်ကြားထားသော ဧည့်သည်တော်များ စုစုပေါင်း (၃၅၀)ဦး တက်ရောက် ခဲ့ကြသည်။
အခမ်းအနားကို အပိုင်း (၃)ပိုင်းခွဲ၍ ကျင်းပသွားမည်ဖြစ်သည်။ ဒီဇင်ဘာ (၁၉)ရက်နှင့် (၂၀)ရက်နေ့ နံနက်ပိုင်းတွင် မြန်မာစာအဖွဲ့ဝင် ဆရာကြီးများ၏ ပညာဗဟုသုတအမွေ လက်ဆင့်ကမ်းမျှဝေခြင်း အစီအစဉ်အဖြစ် မြန်မာစာအဖွဲ့ဝင်များဖြစ်ကြသော ဒေါက်တာမြင့်ကြည်၊ ဒေါက်တာထွန်းတင့်၊ ဒေါက်တာခင်အေးနှင့် ဒေါက်တာအောင်မြင့်ဦးတို့က စကားဝိုင်းဆွေးနွေးပွဲကို “စာလုံးပေါင်းသတ်ပုံနှင့်အနက်အဓိပ္ပာယ်”၊ “မြန်မာစာသင်ကြားရေး”၊ “အပြော ဘာသာစကား၊ အပြောစကားပြေ၊ အပြောသဒ္ဒါ”၊ ခေါင်းစဉ်များဖြင့် ဆွေးနွေးသွားမည်ဖြစ်ပါသည်။ နေ့လည်ပိုင်းများတွင် မြန်မာ-အင်္ဂလိပ်အဘိဓာန် တည်းဖြတ်ရေးကော်မတီဉက္ကဋ္ဌ ဆရာကြီးဦးသီဟက Language Teaching and Language Testing ပညာရပ်ကို သင်ကြားဆွေးနွေးသွားမည်ဖြစ်ပါသည်။ ဒီဇင်ဘာ (၂၁)ရက်နေ့တွင် မြန်မာစာအဖွဲ့ဝင်များနှင့် ပညာရေးဝန်ကြီးဌာနရှိ တက္ကသိုလ်၊ ဒီဂရီကောလိပ်၊ ကောလိပ်များမှ မြန်မာစာ ပါမောက္ခ၊ ဌာနမှူး၊ ဆရာ/ဆရာမများ၏ မြန်မာစာမြှင့်တင်ရေး ညှိနှိုင်းဆွေးနွေးပွဲကို ဆက်လက် ကျင်းပ သွားမည်ဖြစ်ကြောင်း သတင်းရရှိသည်။